周奕瑋為食撼爆額成世多滴汗
主持形象斯文乖巧的「日本通」周奕瑋（Jarvis），原來小時候非常奀皮，不過他對自己的「曳事」已全無印象，他靦腆說：「聽屋企人講番，3歲嘅時候，我有日喺幼稚園放學，因為急住返屋企食雪榚，所以跑得好快，點知個頭撞咗埋牆角啲紙皮石度，即刻流血！當時係嫲嫲湊我，佢驚到送我入醫院縫咗3針，直至依家個疤痕仲跟住我。由於形狀似一滴汗，好多化妝師同工作人員成日提我『印汗』，呢個係伴我一世嘅為食證據！」
另外，Jarvis天生是左撇子，周媽媽想培養兒子姿勢優雅，故用盡方法逼他戒除「惡習」，他說：「最後佢成功改變我用番右手寫字，但食飯始終係用左手揸筷子，我仲天真到以為每個人都可以兩手兼用，直至中三我一邊食飯、一邊寫功課，啲同學話好羨慕我有呢種特殊技能！」
