周佩婷講心唔講金 「煮」力冧男友
日前有傳採訪時被呂慧儀「鬧走」的無綫娛樂台新聞主播周佩婷，即被不少網友為她抱不平並大感心痛，因其外表甜美兼夠「入屋」，早已被視為「好女友」一員。周佩婷亦不負「好女友」之名，直認會親自下廚或製作小禮物等去逗另一半開心，現在單身的她說擇偶條件很簡單：講心唔講金！
近日是非多多的呂慧儀，早前被爆出不滿娛樂新聞台的人員來採訪，無名火起「鬧走」主播周佩婷（Angel）。風波爆出後，不少網民留言表示支持Angel，因她在無綫節目《3日2夜》的甜美形象早已成功俘虜一眾宅男心，更有「Girlfriendable」女神的稱號。
封唐詩詠女神
雖然被大眾冠上此稱號，惟Angel自爆十分男仔頭：「自己性格比較隨性，有時喺屋企都會好粗魯，戙起隻腳坐，同埋亦好大意，同我出完trip嘅同事都會驚咗我，好似我開汽水，佢哋都會企得老遠驚有意外發生。」又自言心目中的「Girlfriendable」女神是唐詩詠，皆因她認為對方平易近人，與她相處起來十分舒服。
雖然Angel自認論盡，但對另一半卻相當有心思，不時絞盡腦汁送上驚喜，她說：「我鍾意煮嘢食，每次拍拖都會做咗煮飯婆，仲會整個主題，見佢哋食得開心，自己都好有滿足感。我亦會整甜品，試過有一任男友11月生日，我整咗11個唔同裝飾嘅cupcake畀佢，令成件事sweet啲。」
最憎游手好閒
作為女神的她追求者眾，不過Angel自爆擇偶首要條件是有心思和上進，更指最討厭游手好閒的男士：「唔鍾意啲男仔覺得有錢就咩都唔做，我記得以前喺外國讀書，有個男仔approach我，佢屋企係有啲錢，但成日都冇嘢做，走堂又唔做功課，每日游手好閒，我就最唔鍾意。男仔努力工作同埋聰明，會識得好多嘢，可以教到我，自己就比較欣賞。」
Profile
年齡：27歲
三圍：34、25、34
作品：《3日2夜》、《Do姐有問題》
工作：無綫娛樂新聞台主播