譚俊彥陳山聰守秘18年誰是真兇？
陳山聰、譚俊彥等孭飛的新劇，以18年前一宗命案作為引子，真相逐步被揭開，故事充滿人性、懸念、猜度等元素，極具追看性！山聰預告劇集有笑有淚有懸疑，與演聾啞的楊秀惠愛情線亦是亮點；而與命案有關連的黃智雯，指角色非常沉重，每日於不安情緒下開工，心情低落。
藝人陳山聰、譚俊彥（Shaun）、黃智雯及楊秀惠等主演的無綫新劇《十八年後的終極告白》，將接檔內地劇《慶餘年》，於本月20日起逢星期一至五、晚上九時半在翡翠台播出。該劇講述一班屋邨長大的後生仔，於放榜日舉行燒烤樂，期間與一名邨內小混混發生爭執，最終小混混喪命！為隱瞞真相，眾人多年間零聯絡，直至小混混的屍首於18年後意外被發現，他們才重新見面商討對策，當中爾虞我詐，真相將一層層揭開。
當年有份隱瞞小混混喪命真相的Shaun，長大後成為專業會計師，有感情穩定的女友趙希洛，惟母親與女友不咬弦導致分手，及後情傾警員智雯。監製王偉仁指，雖然Shaun的角色未如同劇演員般突出，但其實內心情緒複雜，拍攝時亦需應付大量內心戲，他統統能夠駕馭，絕對不容易。飾演重案組督察的智雯，被委任調查命案中的關鍵人物山聰及Shaun，因與Shaun慢慢互相了解而相愛，惟追查的同時發現命案與其家庭背景有莫大關係，絕對是悲劇人物，她說：「家逢巨變，最慘嘅事都發生喺我身上，最深刻係拍攝時處於情緒低落，每日返工都係查案，情緒好不穩，拍完唔敢諗番劇情，要一段時間先可以抽離，所以都係鍾意拍喜劇，開心啲。」
楊秀惠學手語3個月
同樣隱瞞真相多年的山聰，搖身一變成為社團大佬，自言今次乃從演以來最fit一次，他說：「練到一身鋼條都係為咗同何啟南嘅擂台開場戲，當時用咗一個月時間操，戒糖、鹽、脫水，出嚟效果都滿意。」劇中更與聾啞人士秀惠譜出戀曲。王偉仁指劇組特別安排專業人士，花三個月時間指導手語，加上秀惠每日在家苦練，最終成功塑造出角色。秀惠亦不諱言是入行以來最大挑戰：「一般拍劇要記對白同走位，今次加埋手語，仲要有晒情感，同時間兼顧咁多嘢，好大壓力，所以慣咗拍之前一晚通宵練，到場再匿埋練習，唔想拖慢大家進度，好在劇組每次有劇本都即刻畀我，我先可以第一時間同老師上堂練習。」
尹詩沛學揸刀做豬肉婆
獲監製王偉仁大讚演技好的尹詩沛，飾演一名豬肉婆，她坦言平日甚少去街市，故拍攝當日特別提早一、兩個小時到場請教師傅揸刀技巧，幸而臨場發揮不俗，總算放下心頭大石，其次就是挑戰喊戲關口，她說：「雖然角色只係兩集，但心路歷程好複雜，3個月喊咗5、6次，但觀眾睇嘅係剪輯完嘅片段，所以我個情感要畀觀眾感受到，真係好大壓力，好在譚俊彥同何遠東幫助好大，令我順利完成，但拍完係有少少抑鬱情況，要時間慢慢走番出嚟。」
何遠東搞人老婆搵認同
出名好戲的何遠東在《十》劇中是串連幾個主角的關鍵人物，獲監製王偉仁發掘出喜劇以外的潛能，多年前在《心理追兇Mind Hunter》弒母，已令人難忘！今次角色亦是長期處於抑壓之中，因未能忘記多年前的命案而一直失眠。劇中，東東更搭上好友老婆楊卓娜，他說：「鍾意咗兄弟嘅老婆，又唔算勾義嫂，雙方背後都背負好多嘢，呢段感情有苦有甜，如果觀眾認同我哋呢一對就好喇！」