突擊採訪撩起把火？呂慧儀惡唔出樣冇鬧周佩婷
呂慧儀昨日於電視城為處境劇《愛．回家之開心速遞》開工，有指曾主持《3日2夜》的無綫娛樂新聞台主播周佩婷日前突襲採訪，開始便一句「你今日有咩講？」，因而激嬲呂慧儀，更鬧爆對方。
對此呂慧儀笑說：「我冇(口架)，佢入嚟嗰陣我哋正放飯，自己公司嚟採訪當然歡迎，互相幫忙宣傳嘛！佢係有講嗰句說話，我話不如講劇情，仲傾得好開心，之後佢收到電話，話要上公司做啲嘢，攝影師就留低繼續拍。（你冇笑住同人講？）我好難唔係笑住講喎！（知佢被鬧？）唔知，過往探班啲主播我都認得，呢個就少見，可能呢排少新聞。今日丹爺（劉丹）都問我『你發火就係咁咋？』，仲話丹爺、周嘉洛唔敢出聲，都冇咁嘅事，我話我個仔都唔驚我呀！」
周嘉洛：佢只係大聲
同場的周嘉洛、吳偉豪及焦浩軒齊聲表示，拍攝以來未見過呂慧儀發火，而當日在場的嘉洛更「作證」：「唔係咁樣嘅，我見主播收到電話之後離開咗，對話間都冇火藥味，係正常對答，佢只係講嘢大聲，聲線比較高，唔代表冇禮貌。」