政府最新宣布新增美容院和按摩院為需要關閉的處所，名媛湛琪清和藝人鍾采羲分別經營的美容院亦需要由周五（10日）起停業十四日。湛琪清稱已即時通知已預約的客人需改期，她說：「因為撞正復活節假，所以都比較多客，但我哋會依照指引去做，亦已經喺美容院嘅社交網站出咗暫時停業通告。（預計損失幾多？）我都唔係太清楚，但好多客人係舊客，佢哋都係買咗package，所以影響不大。」
而鍾采羲稱早前已避過一次「停業」，故今次避無可避，結果都要暫停，並打算跟業主再傾減租，她說：「我哋會喺停業呢兩個星期做多啲宣傳，同埋會再同業主傾，希望可以高抬貴手，其實業主好好，佢哋之前都減咗半個月租，會再傾吓！」