李幸倪學紋身考天分
歌手李幸倪（Gin Lee）昨日到電台宣傳派台歌《敢》，她說：「首歌係講敢於嘗試、樂於接受挑戰。（你好勇敢？）我都幾鍾意試新嘢。」MV中，她還嘗試玩滾軸溜冰：「我想學咗好耐，好搞笑係學緊嘅時候，有個小朋友喺我隔籬揮灑自如咁溜嚟溜去，我就好驚跌。」又指稍後會再接受挑戰學紋身：「睇吓自己有冇呢方面嘅天分，其實細個都想有自己嘅紋身，不過搵唔啱圖案，所以作罷。」
談到身在馬來西亞的家人，Gin指當地疫情較香港嚴重：「每家人只可以搵一個代表出去買嘢，通常係男人做，好彩嗰邊超市有啲套餐，裏面有肉、有菜咁，網購都好方便。我哋保持聯絡，有時開住個Cam各自食飯，做自己嘢，知道大家做緊乜，佢哋都好悶。（過咗疫情，第一時間返去探親？）都會。」