高海寧紮胸扮麻甩 同翠如爭做王妃
無綫「七公主」名單落實，新劇角色為各人度身訂造。高海寧將飾演一名麻甩司機，揚言會「紮胸」的她昨日突然在社交網晒水着照，趁開拍前大騷身材！
無綫將於5月開拍新劇《七公主》（暫名），「七公主」名單首度曝光，當中包括黃翠如、林夏薇、高海寧（高Ling）、江嘉敏、劉佩玥、鄺潔楹及陳曉華，宅男女神陳瀅亦會客串。劇中沒有「王子」，但有三位實力演員徐榮、鄭子誠及陸永任由「公主」選擇。
飾演律師的翠如受訪時說：「呢個角色好有挑戰，係一個好叻、好狠嘅律師，最近我都不停咁睇好多英國同無綫嘅法律劇。本身好想去法院旁聽，但係最近唔可以啦！」問到會選哪位男演員做一對？她說：「呢三位男演員我都未合作過，如果畀我揀，我梗係揀陸永啦，我直頭當佢屋企人咁，如果變成情侶都幾得意。」
晒胸器練擘髀
至於高Ling昨日突然在社交網晒泳裝照騷身材，可能知道之後飾演性格Man爆又豪邁的司機，所以晒舊照懷緬一下，她受訪時說：「個角色好麻甩，我會剪短頭髮，比以往更短。（使唔使紮胸上陣？）盡紮啦！可能到時會着啲鬆身衫，依家練緊擘大對腳坐，講嘢把聲又粗啲、語氣低啲咁。我開始讀緊劇本，啲對白好倔。」她預告劇中有好多男仔在身邊團團轉，又說：「徐榮我未合作過，如果畀我揀，我想揀佢，可能有新火花。」
林夏薇睇中徐榮
林夏薇飾演共享空間經理，她表示：「今次角色好吸引我，之前未試過，情緒起伏好大，對我嚟講係大挑戰，希望突破自己。」問到最想選哪位男拍檔演一對？她說：「我最熟嘅係徐榮，因為之前一齊去澳門拍《乘勝狙擊》，戲份都多，所以大家熟啲。」