冇得Gym驚走樣 余德丞搓波止癮
「陽光男神」余德丞熱愛運動，現時健身中心和足球場暫時關閉，他相約友人轉戰室外跑步，又以搓波代替踢波「止癮」！做完運動當然要醫肚，他特地買外賣在車上食，避免堂食人群聚集，非常小心！
全港健身中心暫時關閉，但無阻余德丞（Dickson）做運動！日前見他戴上口罩，與男友人到跑馬地，場地空曠，他見人少少才除低口罩，之後開始拉筋熱身。接着兩人跑步，Dickson㷫合合除下外套，又拉高T恤抹汗。
做足消毒工夫
雖然龍門被封，但無損Dickson對足球的熱愛，與友人搓波「止癮」依然盡興。踢到大汗疊細汗，二人休息一會後，用搓手液清潔雙手才戴回口罩，做足衞生措施才離開。其後二人在附近醫肚，見Dickson到茶餐廳買菠蘿包，十分貼地，雖然容易食到周圍麵包碎，但他為求安全，仍選擇買上車食而避免堂食，食之前又再用搓手液清潔雙手才除口罩，十分小心！
保持適當距離
事後記者致電Dickson，他坦言去開的健身中心關閉而「出動」：「習慣做運動，好難停落嚟，難得呢度對外開放，所以叫埋教練一齊嚟練吓，費事過咗疫情之後身形走樣，哈哈！」他透露一星期會去三、四日：「但大家唔好嚟撞我，要保持社交距離，見到咪點頭Say Hi囉！呢度不時撞到熱愛運動嘅朋友，大家好注重衞生，保持需要嘅距離，有時跑步可能會吐口水，但大家唔好咁做，帶嚟嘅口罩就帶番走，唔好破壞環境，享受呢處淨土。」他又表示現時盡量外賣，避免在餐廳進食：「如果被迫坐喺度食，就自帶餐具或消毒餐具。」