朱智賢額吻止步對人夫禁慾

朱智賢與黎振燁「勒」住拍親熱戲，最多只是錫額頭。

何廣沛、江嘉敏、朱智賢、黎振燁及林凱恩，昨晨為新劇《食腦喪B》到尖沙咀一間婚紗店取景，劇情講述何廣沛家姐朱智賢跟黎振燁影婚紗相，故全家出動影相，江嘉敏以何廣沛伴侶身份出席，因她飾演黑道千金，故連「晚裝」都是江湖風，被何廣沛取笑似酒樓部長，她即反擊：「你好好呀？Waiter！」

出閣求簡單

朱智賢的低胸婚紗明艷照人，但着過無數次的她揚言已麻木，小時候想過將來結婚要着到好靚，但人大了反而希望簡單：「可能平時做嘢已經成日扮靚，結婚嗰日開心就得！」她與黎振燁沒有親熱戲，最親密只是額吻，黎振燁笑指導演要求他們加戲：「但我哋都勒住。（驚太太呷醋？）唔係，拍劇好專業嘅！」

另外，談到同劇李君妍的家姐確診新冠肺炎，朱智賢坦言嚇一跳：「我同佢嘅廠景拍完一個月，應該冇事。」黎振燁即抵死地叫她行遠少少。而何廣沛透露已做了快速測試，暫未有報告：「我嘅戲份要接觸較多人，但求安心。」得悉李君妍檢測呈陰性後，他說：「冇事就最好！」江嘉敏則手持貌似咖啡杯的空氣清新器：「埋位嗰陣冇得戴口罩，少咗重保障，惟有去到邊都攬住。」何廣沛搞笑「投訴」：「有次拎住個道具咖啡杯，佢以為我拎咗佢部嘢！」

衣着走「江湖風」的江嘉敏，與何廣沛互相取笑。

朱智賢着過N次婚紗，將來出閣只求簡單。