閂定唔閂？鍾采羲美容店嚇餐飽

藝人鍾采羲（Iris）經營的生活美容概念店，1月開張撞正新冠肺炎來襲，前日「二次刊憲」風波，美容院險面臨關閉14日，Iris坦言心情如坐過山車：「收到消息嗰刻好驚嚇，心諗冇得做喇？要閂舖？已經諗緊同發展商講可唔可以唔收租金，不過之後又突然宣布唔使閂門，只要做好安檢就得。畀佢嚇一嚇，少少忟，無從適應，真係太突然，當然希望疫情快啲受控，唔會再涉及其他行業，但仲驚緊。」她除了為店舖增加消毒次數、為客人量體溫及詢問外遊紀錄等外，再減價吸客，並指七位股東因疫情下變得更團結，有共識會堅持走下去。