何雁詩擔心染疫驚到喊
歌手何雁詩（Stephanie）上周因發燒及喉嚨痛的病徵而鬧出確診驚魂，最後報告為陰性。事隔一星期，她昨日終復工出席電台訪問，問到為何不用自我隔離14天？她說：「有問過醫生，佢話我冇外遊，亦冇接觸緊密人士，所以唔需要隔離，但我同Fred（鄭俊弘）都覺得等埋報告出嚟，知道結果係陰性，佢嗰晚先敢出席《法證先鋒IV》結局嘅活動。」
講到等待出報告的心情，她坦言：「係好差，因為唔係擔心自己，係擔心連累身邊人同年老幼童。」問到有冇驚到喊？她承認有，因當晚她在房隔離，Fred則做廳長：「有喊，嗰晚我同Fred講我瞓啦，佢就喺房外揮手，我就忍唔住喊出嚟，佢遠遠叫我唔使擔心，冇事嘅。」講到收到報告終於放下心頭大石，Stephanie形容當時是開心到飛跳上Fred懷抱中，他亦不用再做廳長。