陳瀅「滯留」加拿大黐實Honey
藝人陳瀅月前拍畢無綫劇《伙記辦大事》後，請假一個月飛返加拿大探望家人，可是疫情肆虐，她的假期最終延長至今仍未結束！據知，5月開拍新劇的她，預算4月中返港並進行14日家居隔離。身在遠方的她近日上載靚相及短片「報平安」，她受訪時說：「呢邊嚴厲執行家居隔離，即係只得兩個人都唔可以聚集，否則罰款1,000蚊加幣！市民只可外出買餸，餐廳淨做外賣，所以我都好安全。」
面對疫境，陳瀅最開心是今次意外地與家人感情倍增：「好似我家姐同細佬，平時喺溫哥華要返工，依家Home Office就大家多咗時間喺埋一齊，疫情未咁犀利嗰陣，我哋一家人約埋去賞花，可以黐實我個外甥BB，家庭樂其實幾多錢都買唔到！」又透露因在家畫畫及下廚，廚藝突飛猛進！
