新冠肺炎全球大爆發，世界各地瘋搶物資！29歲英國樂壇天后Rita Ora的新MV竟在此「非常時期」浪費雞蛋，因而被狂轟！有網民更寸嘴留言：「佢係我過去兩星期搵唔到蛋嘅原因！」
日前「蜘蛛俠」23歲英國男星Tom Holland自爆去超級市場掃糧，卻買不到雞蛋，只好改買三隻雞回家飼養待生蛋，足見市面出現「糧荒」，但此時卻爆出Rita疑濫用雞蛋！其新MV《How to Be Lonely》其中一幕拍攝她在一間滿布雞蛋的房間演出，她表演踩蛋，之後不小心成個人撻低，壓爛地上不少蛋，令蛋汁四濺。而她更索性瞓在蛋上輾轉反側，導致一地都係爛蛋！MV公開後即被網民圍剿，在社交網留言狂插她浪費食物！有人留言說：「有冇人睇過Rita Ora新MV，佢喺個MV整爛成幾百、甚至數千隻蛋？真係浪費食物。」亦有網民諷刺：「如果任何人喺超級市場買唔到蛋，係因為畀Rita買晒！」另有網民要求Rita出面解釋：「Rita，你係咪真係浪費所有嘅蛋？請你話畀我聽係電腦特技，而唔係真蛋！」
近日因疫情「宅在家中」的Rita暫時未就「大嘥鬼」事件回應，但前日她於Instagram開Live教Fans做運動，期間跳高時竟不小心撞到玻璃，她痛到摸住個頭說：「哎呀，點解我咁蠢？」
除了Rita撞親頭，加拿大天王Justin Bieber亦發生「家居意外」，與索模妻子Hailey Bieber玩小學雞遊戲而仆親。話說夫婦倆因疫情而在大宅自我隔離，前日玩到冇嘢好玩，挑戰近期大熱的小學雞「地下有熔岩遊戲」，規則是雙腳不可掂地。片段中Justin着住運動褲周屋爬，最後跳上滑板「代步」衝入房，結果不小心仆親輸咗，負責拍攝的Hailey影住老公瞓在地上尷尬大笑。而當日下午Justin在家中主持網上視像周日崇拜，與牧師在一小時的討論中，不忘大談如何對老婆着迷，又承認自己有瑕疵、有時會自私，但會盡力成為最好的老公。