蔡思貝難得放假搵另一個男人

《踩II》主要演員王浩信、蔡思貝、張曦雯（Kelly）、張振朗及秦沛，日前於將軍澳一間酒店拍攝相遇重頭戲，浩信劇透與師傅秦沛展開第一場對壘，大拋專業法律名詞，笑言對詞彙已「免疫」：「拍晒法庭戲開始熟習，好似變咗另一門語言咁。（有潛質做律師？）唔敢當！知得呢行愈多，愈覺有難度，拍戲過吓癮就夠。」

脫水口乾眼敏感

相反多場脫衣戲份，才真正考起浩信，為保持最佳狀態，脫水之下出現「副作用」，大呻好辛苦：「好彩劇情需要戴黑超，隻眼敏感，可能抽乾個身油份低，皮膚一時適應唔到，拍法庭戲多對白個口又好乾。」他預告下一套劇都要繼續騷肌，不能鬆懈：「淨係食沙律，但好有趣，見證個身形不斷進步。（驚框死每套劇都要脫？）冇諗咁多，做番啱角色嘅事，唔會刻意。」而拍攝當日正是他入行15周年，獲Fans製作相片、影片慶祝。

秦沛與王浩信師徒對決，火藥味十足。

「盲俠」王浩信（左）演大律師，勤背對白之餘，又要操肌脫衣，認真辛苦晒。

思貝跟緋聞男友胡鴻鈞的「戀情」近日鬧得熱烘烘，問到張振朗可見女方春風滿面？思貝笑住搶答：「我對佢係黑口黑面！（你令胡鴻鈞、許廷鏗擘面？）新聞咁講啫，我邊有咁嘅力量呀？日日都對住《踩II》啲人，之前連續19日法庭戲落咗好多苦功，滿腦子都係法庭用語。」又謂難得一日的假期跟爸爸補祝生日：「一開劇就冇見人。（幾耐冇見胡鴻鈞？）唔記得啦。（佢冇車你返工？）冇啦，佢之前順路啫！（屋企人有關心感情事？）冇，佢哋好相信我，我有咩都會同佢哋講。」

張曦雯恨做殺人狂

飾演律師的Kelly指成功拍畢法庭廠景鬆一口氣，下個挑戰則是跟浩信共舞，稍後會抽一日時間同排舞師練習。談到盛傳開拍《法證先鋒V》，問她是否新一輯的靈魂人物？她即興奮話好：「好恨演變態殺人狂魔，因為好鍾意睇恐怖片同打血腥Game。（傳佘詩曼、鍾嘉欣或會參演，有八卦問吓？）冇喎，大前提係小青姐先養好身體。」