44歲日劇女王米倉涼子於1月底被爆與貌似男星尊尼特普（Johnny Depp）嘅阿根廷舞蹈家拍拖後，男友返家鄉，兩口子暫別。疫症影響下，阿根廷已局部封關，男友暫時冇得返日本，仲打亂咗4月開課嘅計劃，但米倉被影到如常去教室學跳探戈。戴口罩嘅佢難掩失落神情，只能期望男友盡快返嚟，解相思之苦。另外，米倉昨日宣布將獨立發展，自立門戶做老闆，今個月31日離開效力27年嘅Oscar事務所。