何雁詩扲荷包出歌貼天文數字
獨立歌手何雁詩昨日上電台宣傳新歌《致有夢想的人》，歌曲甫推出即登網上音樂排行榜首位，她興奮指成績比想像中好：「之前好擔心。（冇白費個荷包？）可以咁講！雖然唔知啲錢搵唔搵得番，但係個好好嘅學習機會。（距離幾遠？）天文數字！」又指為宣傳碌盡人情卡：「當初冇大平台宣傳好驚，但要離開Comfort Zone先會進步，收緊歌做第二首，希望6、7月出。」
至於婚事，她笑稱冇時間搞：「想要個簡約婚禮，點知淨係父母啲朋友都有200人。」對於被未來奶奶踢爆9月在美加註冊，她承認已Book場：「11月就喺香港擺酒，但嗰邊依家開始爆疫情，唔敢Plan太多。（疫情太嚴重就唔去？）可以去嘅都想去。」