馮盈盈闖「疫邨」唔怕中招

昨日四位「是非精」馮盈盈、戴祖儀、陳詩欣及張寶兒到石籬二邨派口罩，期間做足防疫措施，戴口罩、手套、平光眼鏡及着跣水衫等，唯獨詩欣穿上易吸塵的毛毛衫。盈盈透露早前與《#後生仔傾吓偈》拍檔去元州邨派口罩，晚上即收到該處有確診個案的消息，她強調：「係隔籬幢大廈有人確診，絕對唔係我哋去嗰幢，我哋唔係密切接觸者，唔使家居隔離。同埋當日做足防疫，清潔得好乾淨，大家唔使擔心！」她深信「好人一生平安」，所以會繼續幫人。而寶兒發現長者戴錯口罩，覺得應加強防疫指導。

擬上山執垃圾

至於李佳芯、高海寧、黎諾懿及趙希洛則到油塘派口罩，李佳芯指最近行山人多，垃圾更多，打算組團執垃圾，但會低調進行，覺得與男友陳炳銓分開上山較好：「或者問吓佢，做好事都冇所謂，但唔希望被影到。」談及家中缺口罩及廁紙，她指布口罩最多重用一次，但廁紙則冇得「環保」再用：「最後剩番兩卷，開嚟用嗰陣手震，好大壓力！一格格珍而重之，發現抹嘴、抹鼻都唔使一格。（辦大事？）呢個係特別例子！呢排好生性，食得好清淡，最後要朋友跨區幫手買。」而幾時開工則未知。

李佳芯用剩兩卷廁紙，要靠朋友打救。

戴祖儀（右起）、馮盈盈、陳詩欣與張寶兒落區派物資。

否認玩地下情

高海寧表示早前到日本旅行買不到口罩，多得朋友「救濟」，自認迷信的她茹素個多月，為社會及自己積福。對於傳與音樂才子鄧智偉分手並互相Unfollow Instagram，她說：「我成日都Unfollow嘢！其實佢一直冇Follow過我，唔需要放大件事。（依家有拍拖？）咁多年我都冇答過。」

活動結束後，盈盈偕麥美恩、張寶兒及何依婷等返回電視城出席活動，盈盈對於傳與男友「寶寶」翻撻，她強調：「絕對冇復合及發展地下情，亦沒有人追！」至於如何處置曾同居的愛巢，她表示未有最終方案，亦暫沒租客。