Gordon衰戇居Chok到骨折

男子跳唱組合BOP天堂鳥到籃球場為新歌《冒險島》MV取景，新歌月中推出，帶出鼓勵、正能量訊息。面對疫情，昨日他們特意揀選空曠地方拍攝，Tyrese笑言原本想搞Gimmick戴口罩拍防疫MV：「覺得好新奇，但又驚出到嚟唔好睇。（可能戴咗靚仔啲呢。）咁呢個係公司嘅投資，遮樣就唔好啦！」他們做足防疫措施，隨身攜帶消毒用品、搓手液，工作人員都要戴口罩。
Lincoln（左）早前右前臂骨折，現在輪到Gordon（右）右手腕骨折，Tyrese要照顧兩位好兄弟。
Lincoln（左）早前右前臂骨折，現在輪到Gordon（右）右手腕骨折，Tyrese要照顧兩位好兄弟。

望再冇災難

早前Lincoln因練習後空翻發生意外導致右手前臂骨折，未料輪到Gordon右手腕輕微骨折，全因Chok到爆累事！他尷尬拉起手袖展示腫脹「豬手」，憶述事發經過：「真係衰戇居！兩星期前換完衫，就照鏡擺吓Pose睇吓襯唔襯，點知隻手一嘢撼落隻角度，就腫晒，之後去照X光，話裂咗少少，唔使打石膏。一個星期後仲腫痛就去睇跌打，一嚟就話要啪番舊骨，但要整斷旁邊兩舊骨先可以再啪，我冇咁做，戴手套Hold住等佢自己慢慢好。」

天堂鳥落場打籃球，Gordon（右）企埋一邊。
  • 天堂鳥落場打籃球，Gordon（右）企埋一邊。

問到拍MV會就住動作？他說會照打籃球：「係會痛，但真打畫面先靚。唉！我生日就Lincoln斷手，佢生日就我斷手！希望新一年唔好多災多難。」Tyrese抵死笑說要照顧兩位「傷殘」兄弟：「幫吓手拎嘢，啱啱有個鏡頭要高處向下跳都小心啲，整親完手到腳就大鑊，好彩呢首係慢歌唔使跳舞。」