李思雅處女滑雪驚死爆喊
藝人李思雅（Cindy）是前香港網球代表，早前與男友歐遊，順道去瑞士滑雪。身為運動健將的她，網球、滑水及高爾夫球樣樣精，不過竟被Snowboard考起！
面對又高又斜的雪山，Cindy自爆險象環生，爆喊收場：「其實我都係前兩年幫無綫拍節目時，先接觸Snowboard，算係初學者。瑞士啲雪山又高又大，有一日我哋坐直升機上山，又冇問清楚，結果送咗我哋去一個好高嘅地方。男朋友喺加拿大長大，經常滑雪，對佢嚟講冇乜嘢，但我見到真係驚，惟有頂硬上，滑滑吓好驚，經常跌倒，後面又有好多滑雪者衝緊落嚟，當時我覺得好危險，結果忍唔住喊！」
似坐無影櫈
她自爆滑雪時似坐無影櫈：「兩條大髀好似坐無影櫈咁頂住，有啲雪道好窄，側邊就係懸崖，我真係唔敢亂滑，惟有除咗塊板自己一步步行，去到安全啲嘅地方再滑。」