貓酒店蝕六位數 江若琳諗計度難關
江若琳和三位友人合資經營貓酒店逾年，生意理想，惟受市道及疫情影響，單月營業額跌了七成，損失達六位數字，昨日她受訪時說：「啲客去旅行就會送隻貓嚟，但依家少咗人去旅行，有啲客訂咗房，臨時取消行程，就取消貓酒店Booking。」
問到有何自救方法？她表示已成功要求業主減租，同時推出全單8折優惠吸客，又叮囑員工開工要戴口罩、量體溫，如不適要放假，跟客人接觸要消毒雙手，店內長時間開消毒噴霧機，令客人放心。江若琳感激員工齊心共度時艱：「我哋得一、兩個員工，佢哋冇要求加薪，我哋亦冇強行放冇薪假，為咗鼓勵士氣，推出獎金制，多勞多得！」
她對於生意前景信心十足，揚言定會繼續經營：「如果到最差情況，我同啲合夥人一齊做員工囉，平時我都會落店舖親自做清潔o架啦！」她又點名多謝老公蕭潤邦幫手撲漂白水：「佢透過喺澳門嘅朋友，『班』咗兩支漂白水畀我哋搞清潔。」
