14歲被發掘入行並爆紅全球的Justin Bieber，由「小天王」墮落成人見人憎的「麻煩友」，近年才修心養性兼娶老婆，人生似足過山車！他受訪時表示，很想保護近來爆紅的18歲新人女歌手Billie Eilish，以免她重蹈其覆轍，更講到感觸落淚！
日前Justin為宣傳新碟《Changes》接受電台主持Zane Lowe訪問，期間被問到與紅透半邊天的新人女王Billie於Coachella音樂節首次碰頭，他說：「佢勁到癲，佢係個巨星！我哋永遠唔知有幾多機會可以同人一齊，我依家諗起都想喊！之前就發生咗高比（拜仁）嘅事件，你永遠唔知未來係點。」說時感觸落淚，用手捽眼。
早於14歲已出道的他，看見Billie就如看到過去的自己，他說：「我只係想做個好榜樣……我絕對覺得自己要保護佢。我以前好辛苦，咁細個就入行，唔知點樣行。所有人口講就話愛你，但當有事嘅時候就全部背棄你。因為咁，我想佢知道可以依靠我，但歸根究柢，我唔會夾硬嚟，要自然發展。我會等佢行佢自己條路，如果佢需要我，我會出現。」以乖乖仔形象出道的他，愈大愈壞變成「麻煩天王」，多次惹事生非兼被捕，包括沉迷吸毒、濫交、酒駕、向鄰居掟雞蛋等，其後患上抑鬱症。
而Billie亦隔空回應，在Instagram上載Justin的訪問片段，自言少女時代已是對方的歌迷，不但穿上有其名字的衣服，房間亦貼滿他的海報，Justin留言回應：「愛你！」其太太Hailey Baldwin亦留下心心符號。