王敏奕親熱要Warm Up
藝人王敏奕、糖妹及陳貝兒等，近日忙於開工拍攝無綫新劇《香港愛情故事》。王敏奕飾演Cool爆攝影師，模特兒出身的她直言平日喜歡「影人多過畀人影」，並放閃大讚老公曾國祥是其御用模特兒：「佢360度冇死角！」
王敏奕與陳貝兒劇中同樣飾演攝影師，亦師亦友，她們為了今次演出特意報讀攝影課程，希望演得「似層層」。模特兒出身的王敏奕直言平日不喜歡做拍攝對象：「唔係好自在，我反而鍾意影老公，佢咁有型，點影都得！（咁讚佢？）所以佢咪娶咗我囉，哈哈！」
糖妹疫境劇接劇
劇中與謝東閔是一對，王敏奕估計月底就會開始拍親熱場口：「等我哋熟啲先拍都好，但都係攬攬錫錫，冇床戲。（驚老公唔鍾意？）佢冇問過我，但佢係咁專業嘅導演，明白嘅。」談到王浩信與張曦雯拍親熱戲要借位避「炎」，她說：「我哋未決定，不過保護自己同拍檔好緊要，拍得唔舒服會出聲嘅。」
糖妹則飾演王敏奕的閨蜜，她笑說：「私底下我哋都好熟，所以見做佢好朋友，梗係覺得好啦！不過戲內嘅王敏奕好Cool，我要花時間習慣吓。」她又預告稍後會緊接開拍《陀槍師姐2020》，疫境中依然忙爆！
陳貝兒過窩心情人節
至於主持出身的陳貝兒客串過戲癮，她開心地說：「上完堂喇！我盡量模仿專業攝影師嘅舉動同術語。」提到情人節要開工，她笑說：「咁我嘅『情人』就係工作吖嘛！劇組好有愛，知道我食齋，專登幫我搵個齋飯盒返嚟，外景全程做足消毒措施，笠埋鞋套保護我哋，好窩心呀！」