江嘉敏力發千鈞 屙爆廁板
藝人江嘉敏與何廣沛昨日為無綫劇集《食腦喪B》開工，拍攝二人於街頭談情戲份，何廣沛更踩着單車，江嘉敏則當乘客從後攬實，認真甜蜜蜜。江嘉敏又講到最近肚屙不適，竟連家中的廁所板也坐裂。
日前身體不適不停肚屙的江嘉敏，穿上貼身褲顯然清減不少，未埋位時更手拿一部空氣清新機，她說：「我廠景外景都帶住，因為埋位唔戴得口罩，大家圍住研究劇本都清新啲。（病到瘦晒？）個個都咁講，有日屙咗7、8次，搞到屋企個廁所板裂埋，可能用力過頭，男友叫我快啲整番佢。」
談到劇中二人甜蜜踩單車，不過現實生活中卻同聲表示未試過，何廣沛說：「其實都幾危險，所以都係拍劇發生得嘞！有啲情況險象環生，好驚下一秒跌落地。」
男友呷何廣沛醋
而江嘉敏則笑指曾於男友面前大讚何廣沛公主抱她的戲份很Man，結果惹來男友呷醋：「佢話自己都試過公主抱我，又唔見我講，見佢有少少唔開心。（氹番佢？）又冇喎！刺激吓佢，等佢做多啲Gym大隻啲，畀我欣賞吓！」