父母被困郵輪隔日放風 森美：似坐監
新冠肺炎蔓延全球，受疫情影響，多艘郵輪被拒泊岸，其中停泊在日本橫濱的鑽石公主號，藝人森美的父母是當中乘客！森美坦言非常擔心，覺得父母似坐監，希望他們早日返港。
森美與陳貝兒前晚錄影無綫節目《全民開講齊抗疫》，由於有Dirty Team的醫生到場講解，故無綫高度戒備，錄影前後進行徹底消毒。而森美自爆年過70的父母早前坐鑽石公主號郵輪度假，目前雙親仍在橫濱港口隔離，有家歸不得。他表示船上的補給食物、口罩及酒精等非常充足。
叮囑多做運動
他說：「佢哋初一上船，初頭以為冇事，仲可以自由活動，點知船上愈來愈多人發燒同確診，大家都要入房隔離。佢哋住喺冇窗嘅低層房間，呢幾日只靠短訊同照片報告情況，幸好佢哋冇出現病徵，而確診嘅港人亦非父母嘅同行朋友。（呢個旅程原本有你份？）冇！父母冇話我知係坐嗰隻郵輪，怕我擔心，阿哥講我先知。我有叮囑佢哋喺房內做多啲運動，增強抵抗力。（好擔心？）祈禱！希望佢哋盡快返嚟香港。」
情人節有花收
森美昨日接受電話訪問時指母親剛傳短訊給他，指現時可隔日「放風」一小時到甲板，每間房則獲派手機，方便接收疫情資訊。他覺得父母猶如坐監：「佢哋好悶，唔畀佢哋出房，飛沫傳染嘅話仲麻煩。」膳食方面，他指船上已改用即棄餐具：「情人節仲收到花同口罩做禮物，我阿媽話郵輪送，老竇就話香港政府送。」又稱：「阿媽話有啲朋友啱啱驗咗，未知幾時到佢哋，如果呈陰性可能叫佢哋喺其他地方隔離，希望香港政府早啲同日本交涉，船上面嘅檢疫方法好慢，希望可以周旋吓有冇方法快啲，畀佢哋盡快離開。」