《一曲走天涯》盡訴心中情 蓋世寶含淚回味歌手夢

由蓋世寶（LuLu）與黃冠斌主持的清談音樂節目《一曲走天涯》，每集邀請不同年代的音樂人擔任嘉賓，包括Kellyjackie、小肥、李樂詩、唐韋琪、黃翊、鄭敬基、葉文輝（啤梨）、裕美及傅珮嘉等，由他們現身說法唱到街知巷聞的金曲，重溫那些年的集體回憶，更會即場演繹名曲，談談情唱唱歌！節目將於2月15日起，逢星期六晚上10時在77台香港開電視播映。

黃翊愛情得意入「雪櫃」

LuLu表示節目有笑有淚，跟歌手談笑風生的同時，亦因他們的故事感動落淚。眾嘉賓之中，以黃翊的真情流露令LuLu最難忘：「佢講得好直接同好真實，連心底話都講晒出嚟，仲幾度流下男兒淚，令我都忍唔住喊。佢講到當年事業高峰之際因為掛住拍拖畀公司雪藏，後來冇做歌手面對人情冷暖，又要放下藝人身段打工，終於捱過來。」而KellyJackie面對一曲爆紅後事業停滯不前，患上情緒病，幸而最終戰勝病魔，重新振作。

Kellyjackie當年憑《他約我去迪士尼》一曲爆紅，有冇勾起你嘅回憶？	李樂詩即場Jam歌，大晒靚聲。	小肥

小肥改歌詞放笑彈

節目感人又勵志，LuLu笑言與小肥及鄭敬基的對談最開心：「佢哋好搞笑，小肥將佢首金曲《寵物》改咗個搞笑版歌詞，現場清唱咗幾句；鄭敬基好幽默，但唱歌就變咗另一個人咁。我第一次聽佢唱Live，好有酒廊歌手味道，把聲好似張國榮。」

黃翊	啤梨	韋琪姐姐唱歌仔，你聽過未？

整個節目令LuLu感受最深的是，做歌手不容易：「最難得係就算喺好艱難嘅情況，佢哋都冇放棄追尋歌手夢，一直冇停過創作或從事同音樂有關嘅工作，我仍然感受到佢哋熱愛音樂嗰團火。」並自爆曾有機會做歌手，夢想這麼近那麼遠：「當年我仲係做緊兒童節目，有間好細規模嘅唱片公司簽咗我同另一個女仔做歌星，預計兩個人組成女子組合出道，連宣傳照都影晒，但最後間公司關門大吉。」

童趣孖寶難得正經

節目嘉賓之一唐韋琪（Vikki）與蓋世寶同是兒童節目主持出身，兩人識於微時，相識至今逾廿載。LuLu坦言與Vikki感覺似家人，雖然不常聯繫，但感情深厚，見面時無所不談，節目中卻發現有些事從來未聽對方提過：「以前大家做節目嘻嘻哈哈，好少正經咁傾偈。佢係一個閱歷豐富嘅人，入行前喺酒廊唱歌，所以見識好多。不過同佢做訪問感覺怪怪，因為以前係一齊訪問人，第一次要訪問佢。」節目結尾，LuLu再次淚灑人前：「佢用手拍一拍我，鼓勵我，叫我繼續加油，嗰刻真係好有親人感覺，好感動！」