陳山聰老婆送大禮 隨時打孖嚟！
香港近期籠罩於新冠肺炎陰霾下，但昨日情人節娛樂圈喜事多籮籮！藝人陳山聰宣布造人成功，太太懷有身孕，受家族遺傳影響，更隨時「打孖上」，可喜可賀！而羅力威亦宣布老婆雨僑佗B，預產期為8月，笑言家中從此吃飯要加雙筷！
現年43歲的陳山聰，去年11月與拍拖多年的圈外女友Apple拉埋天窗，直言心急做爸爸的他曾揚言：「生仔我唔可以等太耐，因為冇乜好長嘅時間生（口架）喇！」早前他與羅仲謙被拍得「摸龍床」求子，結果繼謙謙與楊怡日前宣布有喜後，陳山聰趁着昨日情人節，亦宣布造人成功！由於其姊曾誕下孖胎，家族遺傳下山聰亦隨時「打孖上」。圈中好友胡定欣、李施嬅和袁偉豪等留言祝福，姚子羚更讚他「有心有力」。
「緊張過中六合彩」
山聰在社交網上載跪地錫老婆肚皮的照片，報喜留言：「我老婆情人節好少會畀驚喜我，不過今年佢送咗份我最想要又好鍾意嘅禮物，感恩上天賜畀我哋一粒小蒜頭。2020我又多一個身份『陳爸』，我會努力好好保護同照顧你同媽媽，希望你可以健康快樂成長。」他接受訪問時表現興奮，笑說：「真係忍得好辛苦，終於可以宣布。」他表示第一次看到超聲波圖片時相當感動，問到小朋友性別，他透露兒童節公布。說到平時太太對他照顧周到，他笑言現在會煲湯給太太飲：「真係一鋪還番晒呀！」對於近日楊怡及謙謙也傳來喜訊，他說：「係呀！畀多啲正能量大家，真係緊張過中六合彩。」