葉麗儀住獅城「確診酒店」返澳洲自我隔離
殿堂級歌手葉麗儀月初在新加坡開騷，由於入住的酒店有遊客確診新冠肺炎，為顧及大眾安全，她返回澳洲後，即自行隔離兩星期。至於馬來西亞華籍女演員劉芷希原定本月初返港，但因父母阻止，需改機票延期回港。
早年移居澳洲的葉麗儀，原定返港宣傳今日推出的新曲加精選專輯，但因新冠肺炎疫情肆虐，故未能返港，她說：「我都希望返嚟，因為香港好多朋友，想為佢哋打氣。」她自爆正於澳洲隔離，因2月1日在新加坡舉辦一場演唱會，其入住酒店有一名內地遊客確診送院！當晚完騷後，她還跟約80位華籍貴賓影相，故翌日返到澳洲，決定自行隔離兩星期。
唔敢接觸家人
葉麗儀憶述當年沙士爆發時，與老公由香港飛澳洲，同樣隔離14日：「今次一樣唔出街食飯，就算同啲孫住樓上樓下，都係用手機視像見面。佢哋煲湯、整鬆餅攞嚟畀我哋食，都係企門口，唔可以摸或者抱佢哋，等佢哋搭𨋢走，我先去門口攞嘢。」
她又指今日情人節是隔離最後一日：「應該要做嘅嘢都做晒，我哋兩公婆情況唔錯嘅。」並指澳洲政府非常緊張疫情：「澳洲有一套好完整嘅隔離計劃，地方咁大，我覺得佢哋做得好好。雖然市面上有人搶口罩、洗手液，曾經缺貨一星期，依家已恢復供應，唔使咁徬徨。」她坦言疫情對其工作影響不大，本月底會到加拿大東西岸舉行入行50周年紀念巡迴騷。
恨拍拖拜姻緣樹
另外，憑劇集《黃金有罪》紅牌舞女「莫莉莉」一角上位的劉芷希，早前趁農曆新年假期，返馬來西亞探望家人，原定2月1日回港，但其父母擔心香港疫情嚴重，要她繼續留在當地，故她將工作押後，抽多些時間陪伴父母。她專程到當地廟宇，祈求疫情盡快告一段落，又自爆去了當地著名的姻緣樹：「希望可以遇到一段好姻緣，每個女仔都想有個幸福家庭。」