暴肥暴瘦40磅 鄧月平停經爆濕疹
擁36F導彈身材的鄧月平為拍戲暴肥40磅，努力減肥後回復昔日狀態，期間卻付上極大代價，因用錯極端方法，導致賀爾蒙嚴重失調，全身出濕疹兼停經4個月，更抑鬱爆喊！幸好及早求醫扭轉壞情況，日前她索爆外出與友人吃飯，因為要忍口「齋聞」冇得食！
現年22歲的鄧月平（Larine），去年為電影《墮胎師》由101磅極速增至143磅，之後她用盡方法減磅，暴肥又暴瘦，更因賀爾蒙嚴重失調而停經4個月，全身出濕疹，嚴重時𢱑到頭皮出血、背脊現血痕！肥爆期她自覺「又肥又樣衰」，壓力極大致抑鬱，怕黑的她試過在家熄晒燈狂喊。幸而Larine靠意志戰勝一切，成功減磅，濕疹亦康復中！
聞吓當食咗
日前，她打扮靚靚約友人食飯，當日天氣頗凍，狀態回勇的她穿上短褲晒白滑長腿，相當吸睛！開餐期間，女友人大啖歎美食，Larine則忍口眼光光望住朋友食，只吃蚊型沙律的她，捧起友人的美食拍照自娛，「齋聞」當食咗。離開食肆時，跟餐廳宣傳人員、電台DJ林柏希相熟的她，更獲對方特意相送。
事後她接受電話訪問，談到減磅影響健康，她說：「初初只係食小量豆腐同小棠菜，頭個禮拜減咗8公斤（17.6磅），因為方法太極端，身體負荷唔到，賀爾蒙失調出濕疹，仲停經4、5個月，我好驚，即刻停止減肥去睇中醫調理，依家慢慢康復緊。」
濕疹最嚴重時，她全身連頭皮都非常痕癢及敏感面腫：「好多時都𢱑到見血，背脊仲有疤，依家要去美容院做機希望消除。有一次，我上車時冇嘢，落車成塊面腫晒，身體狀況真係好差！」