滕麗名斷肋骨插肺啪嗎啡復工
無綫藝人滕麗名旅行時碌落樓梯跌斷五條肋骨，笑言大難不死，必有後福！因劇中父親劉丹近日發燒、咳嗽，阿滕決定為「愛」頂硬上，食嗎啡止痛藥提前昨日復工。
去年12月，滕麗名到日本青森滑雪慶生時發生意外，跌斷五條肋骨，休養一個月後昨日復工拍攝處境劇《愛．回家之開心速遞》，她受訪時說：「喺滑雪場一條結咗冰嘅鐵樓梯跣低碌咗落去，斷咗左邊五條肋骨，有兩條仲斷咗幾節，插入個肺令到內出血！做完手術仲要插兩日喉引流抽番啲內出血，郁到條喉痛到喊。因為個肺縮咗，嗰陣係冇氣講唔到嘢，靠老公傳話。」
「床戰」周嘉洛 瞓低都痛
阿滕在日本留醫兩星期出院，但醫生擔心她身體弱坐飛機容易感染細菌，故在當地酒店再休養一星期才回港，老公則港日兩邊飛照顧她：「依家好番好多，要吹波波練番個肺，但係瞓低都痛，成個月都唔可以轉身。醫生話斷咗五條肋骨起碼要半年先至穩定，完全康復可以做運動就要一年。」又指現時不能大笑，故昨日與周嘉洛拍「床戲」，前一晚食定嗎啡止痛藥。問到是否要追拍攝進度，她說：「原本我未開工，但係因為丹爺（劉丹）病咗，發燒又咳，要9號先開工，所以我就提早咗。」笑言最肉赤是老公：「未見過佢咁緊張我！嗰段時間任發爛渣都得，真係辛苦咗佢，所以批准咗佢同朋友去加拿大滑雪。」
至於周嘉洛透露一直有慰問「阿媽」傷勢：「見佢都有少少痛，會扶吓佢，但佢一埋位個勢就喺度，好掛住有阿媽帶住做戲。」並指劇本已調節，阿滕受傷對進度沒有影響。