王浩信復工考慮Cut緬甸外景

無綫劇《踩過界II》演員王浩信、張振朗、蔡思貝、張曦雯及簡淑兒近日集體患病「冧廠」，停廠3日消毒後，昨日復工。王浩信與秦沛都戴上口罩，浩信表示：「之前拍律師戲對白多，喉嚨唔舒服，小心為上，自我隔離。（有冇睇醫生？）冇，休息後覺得係操勞，亦冇流感病徵發燒同乏力，抖咗一日覺得OK，第2日到其他演員病，有頭痛、頭暈、屙嘔情況，觀察吓好啲。依家非常時期，大家都唔想停工，亦唔係偷懶，注重健康係為身邊人負責。（有幕後人員唔戴口罩？）之前已經提示過，依家大家好注重衞生措施，公司亦喺停車場裝咗消毒機，廠內就有空氣淨化機，同埋多人嘅場口會延後拍。」他透露思貝、張振朗已康復，張曦雯喉嚨則仍有點不適，並指劇集3月會去緬甸拍外景，要視乎公司安排，若有危險則改劇本留港拍攝。