伊健同場登台 馬國明唔敢爭歌唱
馬國明在新加坡登台搵真銀，向來以鄭伊健歌曲作「飲歌」的他，今次與對方同場，不敢再選唱對方的歌，惟有留待下次吸金時再唱過！
出爐視帝馬國明近日精神爽利，心情靚到爆，農曆新年期間除與好友、兄弟姊妹團拜及打牌聯誼外，日前又到新加坡登台搵真銀，更與鄭伊健同場！向來認識馬國明的朋友都知道，他登台或商演時喜歡選唱伊健的歌曲，但今次卻例外，事關伊健同場，他惟有避一避，加上升呢視帝後吸金力大增，將來大把機會再唱「飲歌」啦！
手袋仔孝敬媽咪
昨日馬國明受訪時笑說：「今次都係唱吓歌、發吓新年財，可以同伊健一齊登台好開心，不過我要避開唱佢啲歌，因為聽過我登台嘅朋友都知我幾鍾意唱佢啲歌，第一我覺得佢啲歌好聽，其次我以前睇好多《古惑仔》嘅戲，嗰幾首歌我都熟，不過今次同佢同台就唔唱喇！」出發前，他曾表示要在新加坡找口罩，結果買唔到：「聽聞新加坡天氣熱，流感各樣都唔太犀利，所以口罩存貨冇咁多。」
此外，向來孝順的他日前帶媽咪試手袋，其母揀得心頭好四萬咁口，不知幾開心！馬國明說：「買個手袋仔啫！佢都好多年冇買，我上年都同佢睇過，佢話啲款唔係好啱。（阿媽好開心喎！）最緊要係開心同身體健康！」