湯洛雯新年信邪最怕「鞋鞋」聲
身為圍村人的湯洛雯（靚湯）恭祝各位粉絲鼠年行大運！她表示兒時每逢新春佳節，圍村內外均非常熱鬧：「我喺圍村住到十幾歲，先同家人由大埔搬出九龍。圍村新年真係好多習俗，例如年卅晚踏入子時（11時）前要沖涼，初一婆婆會煮九大簋，親戚拜年聚會搞足成個晏晝，小朋友最開心梗係周圍(豆)利是啦。（最勁收到幾多錢？）5位數，交晒畀媽咪儲。」
而她在英國求學時期，春節會去唐人街「打躉」﹕「雖然氣氛唔及香港，但試過同啲同學走堂去飲茶，如果畀媽咪知一定鬧到癲！」外表時尚的她原來非常傳統，例如新正頭不洗頭、不買鞋：「有年有贊助商送鞋畀我，我話依家唔接得呀！」
