加拿大度歲 鍾嘉欣變習俗顧問
藝人鍾嘉欣農曆新年前旋風式返港出席活動，現時已返加拿大與家人過新年。肖鼠的她答應團隊今年在工作上會更加努力，笑謂在本命年自己會有一定衝擊，故希望發掘到更多才能，並用過去三十多年的經驗給觀眾發放正能量。
最緊要陪住屋企人
她認為過年形式不是最重要，只要一家人齊齊整整就足夠：「依家住喺溫哥華，喺我出世、成長嘅地方，過年可以陪屋企人已經好滿足。以前喺香港拍劇，過年其實唔開心，因為得自己一個，所以以前對新年唔係咁期待，依家就好期待，因為可以陪住屋企人。」
說到過年氣氛，在加國的嘉欣笑言自己變身屋企的「習俗顧問」，並笑說：「因為老爺、奶奶比較西化，反而佢哋問番我，中國人新年應該點過？幾時食團年飯？有乜習俗？要我教番佢哋。其實我唔係好識，因為由細到大都係媽咪處理，我哋跟住去做。」