吳若希命犯婚變 改臭脾氣化解
屬猴的歌手吳若希在鼠年的「夫妻宮」有離婚之險，被再三叮囑要收斂對老公的臭脾氣，否則自己都會行衰運！她又無懼武漢疫情擴散，扶老攜幼全家闖福建過年。
出名迷信的吳若希（Jinny），每年都會到佛堂參拜，踏入庚子鼠年，她自爆被多位師傅叮囑要注意「夫妻宮」：「叫我今年對老公好啲！話我都係脾氣大，兩公婆之間遷就吓！」甚至建議她要對老公Alex盲目崇拜：「師傅叫我今年要對先生非常之好，就算我老公話月亮係方形，我都要話係。（夫妻宮問題有幾大影響？）話有大拗撬，可能真係會婚變！師傅話我頂唔順想走，所以今年希望喺夫妻相處上唔好對小事咁執着。」
老公旺妻 離婚行衰運
主持《姊妹淘》的Jinny透露曾獲師傅指點迷津：「有塔羅師傅話我如果揀離婚，我會好差！如果繼續一齊就會愈嚟愈好，夫妻感情會好和睦，我知成日講離婚唔好，所以會用呢樣提自己。」又承認對着老公經常脾氣大：「Alex都話我對住出面啲人成日笑口噬噬，點解對住佢就忟憎。」自言因緊張老公，想他在各方面做得更好：「唔緊張佢嘅話，就唔會咁着緊啦！」
Jinny家庭觀念甚重，雖然內地疫情嚴峻，昨日仍起程返福建過年：「照返啊！因為買晒機票，如果我唔返去，爺爺嫲嫲會好傷心！好彩屋企擺定幾盒口罩喺度，消毒潔手液一定隨身帶住。」又指十多歲開始習慣回鄉過年，期間中斷過一次，即令她後悔不已：「啱啱夠16歲可以返兼職，啲人話新年返工(手豆)到好多利是，所以嗰年我冇返，但賺完啲錢都唔開心！爺爺嫲嫲八十幾歲，可以嘅就盡呢個孝道，唔想有遺憾。」原來嫁入何家後，老爺奶奶每年都陪她返鄉下過年：「我要講五百次，佢哋真係好好！」
場地：慈航會 服裝：ZALORA