李施嬅聽「師傅」贈言趕住嫁

李施嬅憑大熱劇《金宵大廈》在無綫台慶頒獎禮「開齋」,奪「最受歡迎電視女角色」獎。解16年之癢的她預告今年事業方面相當刺激,有不少新嘗試,而過年後將拍攝加拿大劇集,孭飛做「女一」!

單身的施嬅背後原來一直有高人指點,獲「胡師傅」贈言今年適合結婚,她笑說:「聽好姊妹『胡杏兒師傅』講今年,尤其5、6月係特別適合結婚,希望有姊妹結婚啦!依家仲有幾個月時間,如果遇到筍盤,我會努力跑出,閃婚都冇所謂!我會盡能力,希望快啲唔使再𢭃利是,哈哈!」她笑言「胡師傅」一直有為好姊妹指點迷津:「佢有睇書,係班姊妹入面最勁。我哋屋企啲風水都係請教佢,租屋前會問吓佢,間屋旺唔旺、好唔好,佢講得有紋有路o架!」

問到新年有何節目?她表示會與家人大戰「四方城」,但笑言面對「雀后」媽咪,每年都要做「魚腩」:「新年一定同媽咪打牌,佢打牌好勁,打到攞獎!媽咪有規矩,就算幾細都要打錢,所以每年都輸晒利是錢畀佢,要叫佢手下留情。我冇呢方面嘅運氣,惟有努力做嘢。」