33C郭奕芯洗邋遢被彈鐘
藝人郭奕芯（Ashina）乃獨生女，備受父母呵護，絕對是溫室中長大，思想傳統的她欲於農曆新年前幫忙屋企大掃除，卻慘遭母親「彈鐘」，她惟有趁住農曆年廿八自我大掃除，力谷33C上圍洗邋遢！單身的她已Dry了近兩年，曾遇過「偷食男」，鼠年希望可以覓得好桃花！
Ashina樣子甜美，身材出眾，理應裙下之臣眾多，原來她情路相當崎嶇，近兩年冇拍拖，Dry到暈，更自爆曾遇「渣男」。
曾遇渣男唔信愛情
她說：「我拍拖大約三次左右，試過同個男仔一齊幾年，最後發現佢出軌，好難接受，好似電影橋段咁，但呢個經歷令我學識好多嘢，後尾原諒咗佢。點知佢繼續呃我，仍然一腳踏兩船，令我好震驚，覺得愛情不太可信，更加覺得女仔要有事業，先有安全感。」
不過，Ashina希望鼠年有好桃花，年廿八亦依足傳統洗白白，生於傳統家庭的她，每年也會與父母食團年飯，雖然僅一家三口，但郭媽媽必定下廚，定有蠔豉髮菜炆冬菇，取其「發財好市」意頭。她指母親一向責任感及衞生感重，凡事親力親為，連大掃除也不假手於人：「好多時我想一盡綿力，都會被拒諸門外，佢真係好誇張，每朝都會拖地、吸塵同掃地，去旅行都係咁，幾點起身都會做，就算唔係年廿八都係咁。」
犯太歲成績都唔錯
肖豬的她豬年犯太歲，Ashina說：「犯太歲情緒上係有波動，所以之前都有攝太歲，過年前要去還。（滿意去年成績？）雖然犯太歲，都拍咗幾部電影，又參加咗個烹飪節目，希望新一年繼續拍更多戲、搵更多錢，自己不斷進步，繼續學煮嘢食，拍完覺得自己好多地方未夠好，會學打拳同電影特技課程。」
場地：英皇駿景酒店