江嘉敏爆胎甩底淡定有錢剩

何廣沛、吳業坤、吳岱融、龔慈恩及于淼等昨日到電視城食團年飯，宣傳無綫新劇《大醬園》，女主角朱晨麗因在內地工作未能出席，而江嘉敏因座駕於途中爆胎臨時甩底，她在網上平台說：「大個女，爆胎識自己call拖車。」又指不是凌晨出事，拖車費便宜了一半，已當有賺，果然「淡定有錢剩」。

今次小兒科

江嘉敏接受電話訪問時表示，今次已是第二次座駕爆胎，因此沒有上次般騰雞：「第一次嗰陣嚴重好多，成條『鈴』變晒形，要企馬路中心揮手求救，今次係小兒科，因為揸車嗰陣開咗窗，爆胎嗰下幾大聲，嚇咗一跳！啲朋友教用個泵泵番氣就得，不過爆得太大個窿喇！（人有冇事？）冇事！冇撞到，開得唔快。」

放大圖片	吳業坤斗膽「侵犯」朱朱，何廣沛玩遊戲時有仇報仇。	楊卓娜與于淼出席活動剪綵，楊卓娜澄清妹妹楊怡懷孕的傳言。

而在《大》劇活動上眾人大玩遊戲，坤坤食芥辣時「乸口乸面」，又自爆跟朱晨麗有床戲：「襯番醬油主題鹹鹹哋！」朱朱緋聞男友何廣沛聞言表示無此福分，並盤問坤坤：「你事前有冇溝通清楚？有冇突然加嘢？」坤坤難以招架，搞到滴晒汗求饒：「我唔夠膽啦！最激係兩個人坐喺一張床上面，掂到與掂唔到之間咁，眼神強姦！」何廣沛極大反應「斥責」：「你個強姦犯！」

于淼有壓力

問何廣沛是否因朱朱「投訴」洪永城主動加戲而如此緊張？他說：「諗多咗！普通關心身邊同事啫！（有冇向朱朱了解？）頒獎禮之後就冇見過，成年先見得一次。（見到洪永城會盤問？）宣傳《黃金有罪》都有講有笑，相信演員有專業操守，公司嘅男藝人都係正人君子。」

至於于淼最近被網民推舉成新一代「咪神」，她怕醜謙稱唔敢當：「私下唔鍾意太性感打扮，被封咪神有壓力，唔想肥會狂做運動。」