鄧穎芝張紋嘉賣盆菜發新年財
好姊妹鄧穎芝（Vangie）與張紋嘉（Crystal）三度聯手做老闆娘，趁新年食盆菜團年好意頭，四出搵供應商密斟賺快錢︰「上次賣完大閘蟹，有好多人都封我哋為『蟹后娘娘』，今次都係搵番時節嘢擺上網賣，因為負擔唔到舖租。」Vangie力Sell自家出品「娘娘御品富貴盆菜」與眾不同，有曾經做過一星米芝蓮餐廳的總廚「加持」︰「有一定嘅保證，仲有足料花膠、鮑魚、瑤柱等嘅貴價食材。」
講到上回大閘蟹銷售成績，二人謙稱平分後進帳不算多，但見證到人生第一桶金︰「蟹季做咗3個月，總營業額未扣任何成本費係一百萬，不過成本好貴，所以最後每人分得5位數字。」不過，二人勝在有熟客支持︰「都Plan嚟緊情人節賣花同朱古力，覺得無本生利呢個營業方式好好。」
數口變精
問到兩女可有因生意上意見不合而嘈交？Crystal認為反而加深彼此了解︰「我哋識咗好耐，好熟大家嘅性格、習慣，一直都係互補不足。」Vangie稱大家目標一致為搵錢，又互相信任︰「佢頂得我順就OK。」又笑言數口變精，成功感大過做歌手。而自認內斂的Crystal則變大膽︰「之前啲Call車司機會恰我，依家學識強硬啲，我畀錢佢賺冇理由要受氣。」