李施嬅代抱不平：應該畀角色獎山聰
李施嬅與楊千嬅同奪今屆「最受歡迎電視女角色」獎項，但施嬅對於拍檔陳山聰失落獎項有點不是味兒，認為既然「女角色」獎可以平分，「男角色」獎亦同樣可以分個給山聰！
前晚舉行的《萬千星輝頒獎典禮2019》中，李施嬅憑熱爆劇集《金宵大廈》與陳山聰膺「最受歡迎電視拍檔」，又與楊千嬅平分「最受歡迎電視女角色」，她受訪時坦言心情矛盾：「知山聰冇獎攞，心情開心之餘又失望，但係冇辦法，今年嘅對手好強。其實可以畀多個獎山聰，『最受歡迎電視女角色』都有兩個啦！」
見對手出現心中有數
施嬅坦言等獎等了十多年，平靜面對與千嬅平分獎項，並大讚出爐視后惠英紅實至名歸：「我覺得好得意，雖然自己等攞獎等咗16、17年，但係得獎一刻好平靜，可能之前已經驚晒。又可能我知道對手係邊個，見佢哋嚟到，已經知結果。」對於《金》劇失落「最佳劇集」，她認為得獎劇集《白色強人》同樣是好作品：「想《金》劇攞『最佳劇集』，係因為我哋低成本製作，每個工作人員都好用心，係心血劇，無奈對手太強。（期待開續集？）等緊公司通知，以為臨近頒獎禮會有人打畀我，但等咗電話好耐都冇響。」頒獎禮結束後，她與數十粉絲在場外開香檳，又與粉絲合唱《今宵多珍重》慶祝得獎。
千嬅搵視后對親家
至於楊千嬅坦言捧獎喜出望外，慶幸趕得及回港出席頒獎禮。對於首奪電視獎，她說：「拍劇唔係計攞唔攞獎，最緊要發揮到功能。今次拍咗5個月，過程唔係想像中咁簡單。」又笑指幾位重要獎項得獎者包括惠英紅、李施嬅、馬國明和自己都是水瓶座。問到會如何慶功？她說：「等寶華姐返香港先，會請食飯！」她又寄望日後再與《多》劇一班前輩鬥戲：「好似黃錦燊同張國強等勁人，最好請埋今晚得獎嘅惠英紅、李施嬅同馬國明加入！我可以由《多功能老婆》演到《多功能奶奶》，化個老妝囉！周柏豪演我個仔、紅姐做我親家、馬國明扮佢個仔，拍足40集，寶華姐一定寫到出嚟！」