徐子珊一走了之咪再心思思
港姐冠軍級靚女徐子珊突然宣布移民兼引退，成為近日娛樂圈熱話，不過佢想唔撈其實有迹可尋，自從約滿無綫後，佢開始「深居簡出」鮮有亮相，專心一意享受校園生活。坦白講，娛樂圈呢個行業五光十色，的確好吸引嘅，易入難出，難怪子珊呢個決定，瞬間幫佢換嚟「娛圈清泉」嘅美譽。
講引退，點都爆唔過當年嘅張國榮。嗰陣哥哥事業如日方中，點知突然急流勇退，開完33場演唱會後封咪移居加拿大，不過演藝嘅璀璨同彼邦嘅平淡，完全兩回事，幾年後哥哥終於回歸復出。至於子珊，相信佢嘅決定係經過深思熟慮，唔係霎時衝動，正所謂人各有志，最緊要無悔地行自己嘅路，祝福佢可以活出真正嘅自己，同埋早日覓得真愛。