何基佑「爸爸」閉搬近大自然

藝人何基佑主持兼監製的親子節目《超級奶爸3》正於myTV SUPER熱播,繼續以真人騷形式,為父母解決育兒難題。堪稱圈中育兒專家的他,為了一對子女特地搬屋,認真廿四孝!

不經不覺,何基佑(Kay)主持的《超級奶爸》系列已拍到第三輯,一如以往邀來不少藝人嘉賓分享育兒趣事,當中歌手陳柏宇令Kay印象最深:「我一直都覺得陳柏宇會係一個好爸爸,事實亦一樣。佢小時候曾經入住兒童之家,之後跟媽咪移民加拿大,成長路並唔容易。呢啲經歷可能令佢建立自己屋企嘅時候,會有一啲睇法,但佢好好,冇畀以前嘅經歷影響,非常正面,亦為屋企付出好多。」

唔敢認育兒專家

曾修讀不少育兒課程兼主持了三輯親子節目,Kay堪稱圈中數一數二的育兒專家,不少藝人、朋友都會向他請教,他謙稱只是交流一下:「都係傾吓心得,好似陳嘉寶咁,佢個小朋友同我個女差唔多大,兩個小朋友同步成長。仲有我嘅好兄弟高皓正,我哋會研究點樣教小朋友,啱啱就傾過親子理財,由小朋友3歲開始灌輸儲錢概念,過程中發現自己有啲習慣要改變,反而係小朋友令我哋成長。」

着重活動空間

Kay早前忙於拍戲及做節目後期,本以為農曆新年可鬆一鬆,怎料原來「好戲在後頭」,他說:「新年我要搬屋,因為小朋友鍾意大自然,想搬去近海、近公園嘅地方,等仔女多啲地方玩,活潑成長。」