AGA處女紅館騷救命Oppa撐場
環球歌手AGA（江海迦）等了7年，將如願於4月3及4日在紅館舉行首個演唱會，屆時她將演繹廿多首親自創作的作品，是首位以全創作歌曲踏上紅館舞台的香港女歌手，她說：「7年啱啱儲夠歌開騷，呢個時間不多也不少。」
撼頭失去意識
今次開騷，AGA開心透露救命恩人來港捧場，並憶述17歲畢業時與摯友到韓國旅行，滑雪時意外撼頭失去意識：「嗰個係人造滑雪場，有啲地方變冰，我一路滑停唔到，直剷入一間餐廳，冇咗意識，模糊中知有人抱住我，原來係其中一個韓國男仔團友。嗰時我意識模糊，知佢扶我，我個好朋友喺身邊，咁啱個團有兩個香港護士，佢哋一齊護送我搭纜車落山同去醫院。」
經過搶救，AGA除了腦震盪，頭骨更撼裂兼出血，因言語不通，醫院方面不敢貿然開刀，當時她的情況不宜搭飛機，結果在當地留醫兩日才返港入院治療，她說：「醫生一睇就知有滲血，冇得做手術，要等傷口自行愈合。因為有輕微腦震盪，所以有段時間會頭痛好辛苦，好彩冇長期後遺症。」
兩個願望一同實現
其後AGA與該韓國朋友已沒聯絡，但對方最近突然私訊其好友表示已買飛來港睇她的演唱會，她笑言：「朋友問我記唔記得佢，我梗記得！朋友仲話會集合晒當日個團嘅韓國朋友嚟睇。」又指音樂帶來很多好友：「我同摯友嘅關係由嗌交開始，最記得同佢有一個承諾，大家話將來最想做乜？佢話要做一個最靚嘅大肚婆，我就話好想過海時有自己張海報，難以置信地大家嘅願望今年一齊實現，佢啱啱生BB，我有紅館嘅演唱會海報，真係不可思議。」