李施嬅望登視后：我仲係「親生女」

入行16年的李施嬅憑人氣劇《金宵大廈》一人分飾兩角Alex及Coco的精湛演出，獲網民封為「民間視后」，在本月12日舉行的《萬千星輝頒獎典禮2019》有望再下一城，與影后惠英紅、楊千嬅力爭「視后」寶座。李施嬅受訪時直言因觀眾支持令她有信心攞獎，由過往陪跑到有機會問鼎，覺得像奇迹一樣。她笑說：「我連『飛躍進步獎』飛咗五年都飛唔起，以前點敢諗攞視后？離開TVB我已經對獎項放低咗！《金》係2019年一個奇迹，我好似發緊夢咁。提名年年有，但今年係最有信心、機會最大嘅一年，但對手亦都係最強。」

李施嬅對「民間視后」稱號感到很有愛，但不認為如外間所指無綫欠她一個獎，她說：「唔覺得TVB欠咗我任何嘢，我有嘅嘢都係TVB畀我。」今年視后大熱皆非「親生女」，令戰況更激烈，她說：「未試過女主角熱門都唔係『親生女』。不過，我覺得我係『親生女』，因為我喺TVB出世，依家只係離鄉別井去咗外地工作啫！呢度係我屋企，如果得到爹哋、媽咪認同畀呢個獎我，對我嘅演藝生涯嚟講係一件圓滿嘅事。」講到「視后」兩大勁敵惠英紅及楊千嬅，她形容二人是神一般的對手，謙稱演技不能跟她們相提並論，而自己唯一優勢是一人分飾兩角，發揮較大。

擔正加拿大新劇

曾在歐美憑微電影獲封雙料影后，李施嬅去年再憑加拿大劇集《血與水》第三季競逐有「加拿大奧斯卡」之稱的《2019年加拿大銀幕獎》女配角獎，燃起她心中團火、信心大增。她透露已落實在2月底開拍新一季，更「升呢」孭飛做主角：「拍咗差唔多30套劇，係第一次自己個名行先，覺得好榮幸。」

場地：Hyatt Centric

服裝：J'Sister