江嘉敏Share香口膠 陳曉華：有味OK！
藝人何廣沛、江嘉敏與陳曉華等昨日為無綫新劇《食腦喪B》（暫名）試造型，何廣沛以喪屍Look示人，江嘉敏則挑戰紅斑狼瘡症患者角色，要長期黑面：「我仲係黑幫大佬嘅女，成日要黑面又唔可以笑，對我嚟講好大挑戰。 」戲中與陳曉華友好，各自跟何廣沛有感情線，問有否親熱戲？她倆表示未有完整劇本，江嘉敏笑說：「我同陳曉華親熱！原本我個角色係要食煙，但我唔識食，所以改食香口膠代替，入面原本有場戲係我同曉華一支煙兩份食，依家唔知係咪要Share香口膠？」陳曉華笑說：「你唔好咬到冇晒味先畀我，有味係OK！」
何廣沛扮喪屍 男女通殺
至於飾演喪屍的何廣沛自言會有更恐怖的形象：「個嘴唇會乾裂啲，頸上會有青筋，依家呢個係有少少肚餓嘅造型。（要長期戴有色隱形眼鏡？）我有戴開，所以都習慣，係有少少攰，好彩唔使長期戴住。劇中肚餓要食腦，但拍得有少少取巧。」他表示今次劇情天馬行空，但會有感情戲：「喪屍都可以拍拖！我會同江嘉敏、陳曉華有感情線，仲好似有個男仔暗戀我，喪屍都好受歡迎！」
