社會運動觸發近半年，嚴重影響港產片發展，加上內地影市低迷，令不少影視公司倒閉，有指今年本土製作僅得47部，約8成電影幕後「冇工開」，更有人轉行揸的士。導演林超賢坦言：「知道依家市道差，我就想做到人人有工開，嚟緊會同楊生（楊受成）開套戲，盡量用番香港crew。我嘅製作不嬲都用得多人，依家《緊急救援》後期咁，平時只用3、4個人跟，今次用足15個，增加大家就業機會之餘，都想培育多啲幕後新血。」
「香港電影工作者總會」會長田啟文（田雞）則對影業低迷大感無奈，直言中、港電影公司老闆擔心前景，不敢貿然投資開戲，內地更出現排擠香港幕前及幕後的情況：「有啲內地團隊擔心用咗香港crew，日後如果審批會唔通過好麻煩，所以寧願唔用。」為了救亡，田雞有意相約其他屬會商討，進行一次大改革。