林欣彤落淚多謝緋聞男友捧場
去年因失聲取消處女售票演唱會的林欣彤（Mag），前晚恢復狀態勇戰旺角麥花臣場館，更獲緋聞男友、組合天堂鳥成員Tyrese現身撐場，雖然Mag繼續拒為對方加「名份」，但有多謝對方到場。而Encore時，她更忍不住淚灑舞台。
Mag獲緋聞男友Tyrese捧場，她以露腰裝及短裙登場，講笑問Fans︰「有冇人拎咗上年張飛入嚟？」嘉賓出場前，她指對方是第一個人陪她唱K的人︰「我兩、三歲嘅首本名曲《一人有一個夢想》，係佢教我唱。」及後爸爸現身，拖住Mag合唱《今生今世》，全場拍手歡呼，唱畢Mag自認衰女包：「成日報喜不報憂，驚爸爸媽媽擔心，對住佢哋想逞強，所以想同佢哋、同擔心我嘅人講，你哋已經送咗最強嘅特效藥畀我，就係音樂同唱歌。」
下站向紅館進發
之後Mag分享經歷患情緒病的低潮心情，因受盡病魔煎熬，體重急降，除了「喪失」語言能力之外，就連匙羹也拎不起︰「個身痛到有問自己點解要經歷呢啲，依家個天畀番公眾人物呢個身份我，想安慰我同同病相憐嘅人，上年咁辛苦，但依家都開到演唱會，我冇事啦！覺得高處嘅風景未必係最靚，反而低處仲靚，身邊嘅愛係最靚嘅風景，所以經歷低潮一定會捱過，只係辛苦啲啫，希望大家加油！」最終她兩度Encore，又忍不住淚灑舞台。
騷後受訪時，Mag興奮表示鬆一口氣，並指《今》是送給爸爸的禮物，希望下站向紅館進發。講到受損的聲帶，她稱已康復八、九成︰「係磨練嚟，媽咪成日煲好多湯水畀我。」提起Tyrese到場，她說：「我知呀！多謝佢。（唔叫埋佢上台合唱？）咁我要邀請好多人，好多歌手都嚟咗。（佢唔係特別重要咩？）大家都咁重要，佢冇咩特別身份，都係普通朋友。」有關情緒病，她坦言去年復發時影響聲帶及上半身，導致劇痛︰「依家穩定咗，控制得好好，之後會休息幾日，再同好姊妹去旅行。」