趙頌茹愛無限期等到60歲
藝人趙頌茹日前與兩位女失婚素人飛往東京，拍攝ViuTV節目《一切從失婚開始》，令她對「離婚」有新睇法：「喺嗰度訪問專處理離婚嘅律師，佢睇案件輕描淡寫，話畀我哋聽佢有個朋友結過3次婚。我哋又同退咗休嘅AV女郎傾偈，最終佢都覓得真愛，令我覺得我哋嘅處境唔係咁差啫。」
離婚後趙頌茹曾遇過有發展可能的男士，無奈最終因文化差異而失諸交臂。談到選擇另一半的首要條件，是否要非常疼錫兩個囡囡？她說：「要包容同接納，如果只係錫佢哋而唔重視我，就梗係唔得啦。我好羨慕啲五、六十歲墮愛河嘅長輩，覺得戀愛係冇年齡界線嘅。」
談到前夫周永恒，她說：「真係冇乜聯絡。（佢一出事傳媒就搵你喎！）依家要搵都搵佢現任太太啦。我祝福佢，希望佢會成熟，明白對自己嘅下一代，『身教』好重要。」