關楚耀中獎 豉油廁紙都收貨
歌手關楚耀（Kelvin）與王灝兒（JW）昨日出席商場舉行的聖誕活動，Kelvin表示會跟家人、朋友及女友共度佳節：「二人世界好甜蜜，不過食物選擇就少啲，人多可以食多啲嘢，今晚會每人煮一道菜。」JW同樣喜歡大班人過節，今年亦找不到時間跟男友二人世界慶祝。
問到有甚麼聖誕禮物？Kelvin笑言曾收過豉油：「我鍾意煮嘢食，所以OK，啱我，就算係兩條廁紙都唔介意！」JW則大爆男友會花很多心思買禮物整蠱朋友：「佢會將份禮物包到好似風扇咁，其實就係筲箕、掃把加垃圾剷，佢好多呢啲計。」工作方面，她透露除夕會去澳門與陳奐仁做倒數騷。