產後升Cup：上戶彩：34歲日本女星上戶彩同男團EXILE隊長HIRO結婚7年，2015年生咗大女之後，今年7月追仔成功，誕下第2胎囝囝。前日，佢現身擔任搞笑比賽節目主持，不時喺鏡頭前豪放伸脷大笑。身穿黃色晚裝嘅佢，產後上圍又再升Cup。
重現歡顏：許英智：韓國女團KARA前成員許英智前日喺社交網上傳新相，着住紅衫嘅佢戴上聖誕帽同鹿角頭飾，似乎準備好迎接聖誕節，唔少粉絲見到偶像露出甜美笑容，知道佢已經走出舊隊友具荷拉自殺離世嘅傷痛，都戥佢開心，仲有好多網民留言祝佢聖誕快樂！
結婚喇：徐孝琳：韓國34歲女星徐孝琳上個月宣布同金守美個仔、任食品公司老闆嘅鄭明浩即將結婚同懷孕嘅喜訊，前日一對新人喺首爾舉行婚禮，請咗唔少圈中好友，女團Rainbow出身嘅智淑喺婚禮上接咗花球，佢早前被爆同企業家拍拖，唔少人都猜測佢哋好事近！