杜德偉囝囝遺傳音樂天分
杜德偉（Alex）近日於台北，為平安夜在北京舉行的巡唱綵排，笑言雖然忙到「六親不認」，但太太李曉冰專程帶寶貝仔Alex Junior（AJ）探班，他被迫投降：「對住AJ我冇辦法。」3歲的AJ連續兩日陪Alex練歌，經常模仿爸爸唱歌及跳得意舞。
昨日Alex受訪時讚囝囝有演藝天分：「佢好鍾意模仿人，我咪畀支咪佢，我唱乜，佢唱乜，佢又唔知自己唱乜，但啲音好準。」不過北京的歌迷暫時未有機會欣賞AJ上台演出，皆因當地天氣太凍，加上Alex希望集中精神演出，叫囝囝開騷前回港，待完騷後即返港陪家人過聖誕節。
